تخيّل إنك قضيت سنين تجتهد وتتعب عشان توصل لشيء تمنيته و رسمت له أحلامك وتخيّلت نفسك فيه ألف مرة، وبالنهاية ما صار لك، او بطريقه افضل ربي ما كتبه لك

وبعد كل تعب تعبته وكل حلم حلمته وتمنيته تسأل نفسك، ليه؟

يمكن أصعب شعور مو إنك ما وصلت

الاصعب انك تشوف غيرك يوصل ، وتبدأ تتساءل ليه أنت للحين بمكانك، وليه الطريق اللي تمنّيته ما انفتح لك، رغم كل محاولاتك وتعبك وإجتهادك

بس أبيك تعرف إنك مو متأخر لمجرد إن غيرك سبقك ومو فاشل لمجرد إنك ما حصلت على الشيء اللي تمنّيته. أنت إنسان حاولت واجتهدت، وعدم وصولك هالمرة ما يلغي تعبك، ولا يقلّل من قدرتك على الوصول في يوم من الأيام

وأحيانًا نتعلّق بأمنية لدرجة نحس إن سعادتنا كلها معلّقة بتحقُّقِها

وننسى إن الحياة أوسع من باب واحد وعندنا ملييون

أو بالأحرى ننسى فكره ان كله خيره وكله لسبب ولحكمه لو عرفناها كنا ما حلمنا ولا تمنينا الشي.

يقول الله تعالى: ﴿وَعَسَىٰ أَنْ تَكْرَهُوا شَيْئًا وَهُوَ خَيْرٌ لَكُمْ﴾.

يمكن اليوم ما تفهم ليه ما صار لك اللي تمنيته ويمكن تحتاج وقت عشان تتقبّل وتوقف تقارن بدايتك بمرحلة وصل لها غيرك. وهذا كله طبيعي، مو مطلوب منك تكون راضي عن كل شيء من أول لحظة، ولا إنك تخفي حزنك وتتصرف وكأن ما صار شيء.

أخصّ بمقالي وكلامي أُمنياتنا لتخصصات و وظائف ما انقبلنا فيها

تعبت؟ سهرت؟ وتوترت وتمنييت وسعييت واجتهدت ب بالقدرات والتحصيلي وتظغط على نفسك لاجل حلمك ومناك ومستقبلك، بس؟

لحظه رساله القبول و قبولك ب تخصص ما تمنيته، ولا سعيت لأجله، خيبه الامل والضيق اللي يجتاحك وانت تشوف السعي والتعب ذهب سدا

او حتى يمكن عدم قبولك في اي تخصص

خيببببه أمل

لكن لا تخلّي خيبة مرحلة تقنعك إن مستقبلك انتهى، ولا تظن إنك لازم تعرف خطوتك الجاية من الحين

خذ وقتك، حاول مرة ثانية إذا قدرت، وغيّر طريقك إذا احتجت، وتذكّر إن الأبواب اللي ما انفتحت لك مو دليل إنك ما تستحق ومو دليل انك ما اجتهدت

تذكر دايم ان الاهم من تحقيق الامل هو عوامل تحقيقه

الاجتهاد، التوكل على الله وتسليم الامور له والاخذ بالأسباب

وحط ببالك ان مو كل حلم تسعى له يمكن يتحقق

انت سويت كل اللي عليك من سعي واجتهاد؟ هذا المطلوب والباقي ل رب العباد

وإرضى بالمقسوم

والرضا مو إنك تتوقف عن التمنّي،

الرضا إنك تسعى للي تبيه، وإذا ما صار لك، ما تفقد ثقتك بالله ولا بنفسك.

صح، يمكن الحياة ما تعطيك الشيء اللي انتظرته، وفي المقابل تفتح لك بابًا لم يُخيّل لك وجوده

فلا تستعجل الحكم على حياتك، أنت للحين في الطريق، ومو كل طريق تأخّر وصولك فيه يعني إنك ضعت. أحيانًا كل اللي تحتاجه إنك تكمل، بقلب أهدأ وثقة أكبر إن اللي جاي ما زال يحمِل احتمالات كثيرة تستحق إنك تعيشها.

🤍🤍🤍🤍🤍🤍

ما الفرق بين الشوق والحنين؟

الشوق والحنين، أحس إننا دايم نستخدمهم كأنهم نفس الشي نقول اشتقت وحنّيت وكذا

بس فعلًا بينهم فرق كبير

الشوق بالنسبة لي أحسه أبسط، يعني أشتاق لشخص أشتاق أشوفه أسمع صوته أجلس معه

كأن فيه شيء ناقص بغيابه وأنا أبي وجوده يرجع

بس الحنين أحسه أوسع من كذا بكثيير

الحنين ممكن يكون لشخص بس ممكن يكون لوقت كامل كنا زمان فيه أو مكان قديم كنا نعيش فيه

بيت الجده

بيتكم القديم

أو حتى نسخة قديمة منك ومن أشخاص كانوا حولك

والفرق هنا إنّ الحنين هو الإشتياق للاةأشياء اللتي لايُمكن الرجوع لها

زي ذكريات بيتكم القديم

لريحه عطر تتذكر فيها أيام ما تقدر ترجعها

بينما الشوق انك تشتاق لذكرى تقدر تُحيي وجودها

مثل أُخوك المبتعث اللي إلتقيتوا فيه وأخيرًا في إجازه العيد!

يعني أحيانًا ما نكون مشتاقين لشيء محدد

بس نشتاق لأيام معينة

نشوف صورة قديمة مثلًا، وفجأة نحس بشعور غريب

والغريب إن الصورة نفسها يمكن ما يكون فيها شيء مميز

بس إحنا ما نشوف الصورة كصورة

نشوف المكان اللي كنا فيه، والناس اللي كانوا معنا ونتذكر وش كنا نسوي وش كان شعورنا وقتها

حتى أشياء صغيرة جدًا يمكن ما كنا منتبهين لها وقتها

يمكن ريحة المكان أو صوت أحد أو أغنية كانت تشتغل، صوت قارئ من راديو الجده أو حتى شكل السماء وغرُوبها في ذاك اليوم

وأحيانًا أشوف صورة قديمة وافهم اني فعليًا مو مشتاقة للمكان قد ما أنا مشتاقة لي وأنا في ذاك المكان

وهذي يمكن أكثر فكرة أحبها في الحنين

إنك مو دايم تحن لشيء كان حولك، أحيانًا تحن لنفسك وشخصيتك القديمه

لنسخة منك كانت تضحك على أشياء معينة أو كانت أبسط

ويمكن عشان كذا بعض الذكريات تكون مؤلمة

مو لأنها كانت سيئة، بالعكس، يمكن لأنها كانت حلوة لدرجة إنك تتمنى تعيشها مرة ثانية وأنت عارف إنها مستحيل ترجع وحتى لو رجعت ما حترجع بنفس لذاذه الشعور و مشاعره !

وأحيانًا حتى الأماكن نشتاق لها!

مكان كنا نروحه كثير أو بيت قديم، مدرسة، شارع، بحر

وبعد سنوات لو رجعنا له يمكن نكتشف إن المكان نفسه ما تغيّر كثير

بس إحنا اللي تغيرنا، النفس اللي فيه مختلفه

وأحس هذا الشيء اللي يخلي الحنين غريب، إنه يخلينا نشتاق لأشياء ما نقدر نرجع لها حتى لو كانت قدامنا وسهله

ومو شرط أصلًا إن الحنين يكون لشيء عشناه!

أحيانًا نشتاق لأشياء ما صارت أصلًا!

زي حنينك لطفلك المستقلبي! وللبيت الحنون اللي ح تصنعيه و ح يضمك انتي وعيالك والشخص المنشود ! ❣️

والحنين مو دائما ذِكرى سعيده

أحيانًا تكون ذكرى مُؤلمه زي ريحة عطر كنت تستخدمه في آخر ايامك في الثانوي ! او حتى في أيّام مريره

تحن لها لكن بشعور مايبي يرجع لها.

🤍🤍🤍